ENKELE OPMERKINGS OOR JAN VERMEULEN SE ASEM
Die betekenis van name
Lizette (Belofte aan God) en Theo (Theophilus – liefhebber van God) se name is ironies want hulle karakters weerspreek hulle name. ook Floris se naam (blom) is ietwat ironies want al wat by hom blom is puisies.
Nicolene beteken oorwinning en sy is die begin van Barries se oorwinning.
Ongelukkig word sy voortgang vertraag deur Olga (heilig) wat enigiets behalwe heilig is, maar uiteindelik vind Barries Eunice (gelukkige oorwinning).
Padlangs maak Barries ook ‘n goeie vriend, Fillie, (vriendelike liefde) en hy neem aan ‘n hond wat hy Jona noem. Jona is ‘n profeet wat die sondige stad Nineve tot bekering gebring het en die hond Jona speel ‘n rol in Barries se “bekering”. Die veearts vertel Barries dat honde van Jona se ras dikwels gebruik word as gidshonde of terapiehonde. Toevallig is Jona ‘n gidshond maar hy dien ook as ‘n gids vir Barries na die regte pad en hy speel ‘n belangrike terapeutiese rol vir Barries.
Paul se tattoeëermerke
Paul verduidelik aan Barries die betekenis van sy tattoeëermerke. Die een vertel van sy loopbaan as onoorwonne bokskampioen. Sy boksvermoë het eintlik veroorsaak dat hy in die tronk beland het.
Die ander dui aan dat hy ‘n “keeper” is – iemand wat beskerming bied aan ander, ‘n rol wat hy steeds vervul deur beskerming te bied vir Stef en Olga, Barries en later vir Barries se ma.
Eunicé se blindheid
Barries se aanvanklike verhouding met Lizette dra om hulle lus vir opwinding en seks en is oppervlakkig en uiterlik. Lizette hou van Barries want hy lyk aantreklik. Barries is oortuig dat as hy seks met Lizette hê sal hy gelukkig wees maar sy bevraagteken dit. Sodra Barries in die moeilikheid beland is Lizette baie gou om hom te verwerp en haar aandag op Theo te vestig.
Eunicé kan nie en sal nooit vir Barries kan sien nie maar sy “sien” sy innerlike karakter en is daartoe getrokke. Hulle verhouding is dieper en nie oppervlakkig nie en gaan om ware vriendskap. Barries vind haar baie aantreklik maar hy is nie bereid om haar te uitoorlê nie (to take advantage of her). Barries vind dat Eunicé hom werklik “gelukkig maak”.
© J. Rich 2020